Vorontsov meydanı Bakı şəhərində, indiki Cəlil Məmmədquluzadə, Balababa Məcidov və Ağadadaş Qurbanov küçələri ilə əhatə olunan ərazidə yerləşirdi. Meydan XIX əsrin ikinci yarısında yaradılmışdır. Bu, Quba meydanından sonra şəhərin ikinci böyük meydanı hesab edilirdi.
Vaxtilə burada kömür yandırıldığından meydan el arasında “Kömür meydanı”, yaxud “Kömürçü meydanı” adlandırılırdı. Meydanın formalaşmasından sonra burada bazar fəalliyət göstərməyə başladı. Bakıya satmaq üçün komür gətirən kömürçülər buraya yollanırdılar.
Memar Şamil Fətullayev kitabında belə yazırdı: “Daha geniş olduğu üçün Vorontsov meydanı bazar və şəhər tərəzisi yeri olaraq seçildi, ağac kömürü və yem ticarəti bu əraziyə köçürüldü. Meydanın yerli təbirlə “Kömür meydanı” adlandırılması da elə buradan qaynaqlanır”. [Şamil Fətullayev. Bakıda şəhərsalma XIX əsr və XX əsrin əvvələrində. Bakı-2013]
Kömür meydanında Quba meydanından fərqli olaraq, alverdən başqa müxtəlif əyləncələr də keçirilirdi. Burada tez-tez pəhləvan güləşləri, xoruz və dəvə döyüşləri baş tuturdu. Şəhər əhalisi döyüş günləri haqqında xəbərdar edilirdi. Meydanda taxtadan hündür bir masa düzəldilərək üstündə oğru və cinayətkarlara cəza verilərdi. Bu bazarda köhnə və nimdaş paltar, müxtəlif ev əşyaları satılırdı. [https://melumatlar.az/blog/2596/bakida-meydan-ve-meydancalar] [М.Сулейманов. Дни минувшие. Баку-1987]
1913-cü ildə Bakı şəhər hökuməti baş şəhər bağbanına Kömür meydanını digər meydanlarla birlikdə təmizləmək və onların yerində şəhər bağçası salmaq tapşırığı verir. Lakin bu sərəncam yerinə yetirilmir və bazar fəaliyyətini davam etdirir.
Sovet dövründə meydanın bir hissəsində çörək zavodu inşa edilir və bazarın ərazisi azaldılır. Lakin bazar 1980-ci illərə kimi fəaliyyət göstərir. Burada yerləşən kerosin dükanları ərazidə 1955-1956-cı illərə qədər qazın mövcud olmaması səbəbindən əhəmiyyət daşıyırdı. [https://azerhistory.com/?p=27143]
1980-ci illərin sonunda Kömür meydanının yerində ticarət mərkəzi tikilmişdir, lakin 1990-cı illərin sonunda sökülmüşdür. 2000-ci illərin əvvəlində Cəlil Məmmədquluzadə küçəsində meydandan yalnız bir neçə dükan qalmışdır: burada samovarlar təmir edilirdi, kömür və köhnə məişət əşyaları satılırdı.
