Rafiq Babayev 31 mart 1937-ci ildə Bakıda anadan olub.
1943-1950-ci illərdə musiqi məktəbində təhsil alan Babayev, oranı bitirdikdən sonra Asəf Zeynallı adına musiqi məktəbinin fortepiano sinfinə daxil olub. 1954-cü ildə buraxılış imtahanında onun ifa etdiyi proqrama klassik əsərlərlə yanaşı, amerikalı caz pianoçusu Bill Evensin kompozisiyası da daxil edilib.
Sonradan özünü caz musiqisinə həsr edən Rafiq Babayev 1959-cu ildə Bakı Konservatoriyasını bitirib. O, 1955-ci ildə caz qruppu yaradıb və SSRİ-nın müxtəlif şəhərlərinə qastrol səfərlərinə çıxıb. Bakıya qayıdandan sonra SSRİ xalq artisti Rəşid Behbudovla tanış olub.
1965-ci ildə Rafiq Babayev “Qaya” qrupunun musiqi rəhbəri təyin edilib. 1967-ci ildə Rəşid Behbudov Mahnı Teatrını yaradanda, Rafiq Babayevi bu teatrın musiqi rəhbəri vəzifəsində çalışmağa dəvət edilib. Bu illər ərzində o, caz musiqisi sahəsində yaradıcı işini də davam etdirib, Tallində keçirilən Caz festivalında iştirak edib və onun laureatı olub.
Babayev 40-dan çox filmə mahnı bəstələyib. Onların sırasına “Təhminə”, “Çörək”, “Yaddaş”, “Sehrli çıraq” kimi filmlər daxildir. Həmin illərdə Rafiq Babayev ictimai işlərlə də məşğul olub, müxtəlif müsabiqələr və festivallar təşkil edib.
1991-ci ildə bəstəkar “Cəngi” folklor-caz kollektivini təşkil edib və səsyazma studiyası yaratmışdır. O, folklor çalğı alətlərindən istifadə etməklə, Qərb və Şərqin musiqisini birləşdirərək kompozisiyalar yaradırdı.
1993-cü ildə Rafiq Babayevə “Xalq artisti” fəxri adı verilib. O, Azərbaycanda Bəstəkarlar İttifaqının üzvü seçilmiş ilk caz bəstəkarıdır.
Rafiq Babayev 19 mart 1994-cü ildə 20 yanvar metrostansiyasında ermənilər tərəfindən təşkil olunmuş terakt nəticəsində, 57 yaşında həlak olub.
Müslüm Maqomayevin xatirələrindən: “Rafiq Babayev əfsanəvi pianoçu idi: həm klassik, həm də caz musiqisini mükəmməl ifa edən parlaq solist... Rafiq heç vaxt metrodan istifadə etmirdi, maşını var idi. Son günündə radioya tələsirdi...Gecikdiyini hiss etdi və həyatında ilk və sonuncu dəfə metroya enmək qərarına gəldi. Və tale istədi ki, məhz bu qara gün və saatda, bu dəqiqələrdə Bakı metrosunda bir çox insan həyatını aparan dəhşətli partlayış səslənsin. Rafiq də onların sırasında idi.”
Mənbələr:
