Oqtay Cəfər oğlu Ağayev 7 noyabr 1934-cü ildə Bakıda anadan olub. [Azərbaycan Milli Ensiklopediyası. Cild I. Bakı-2009]
O, 1953-cü ildə ali təhsilini yarımçıq qoyaraq indiki Asəf Zeynallı adına Musiqi Kollecinə daxil olur. Burada müəllimi olan musiqiçi Sofya İvanovna Xalfen Oqtaya vokalı öyrədib və onun vokalist kimi inkişafında rol oynayıb. [https://kulis.az/xeber/media/qarovulcu-islediyi-teatrda-solist-olan-tacikistandan-balerina-qaciran-xalq-artisti-27197]
Əsgərlikdən qayıtdıqdan sonra Ağayev təhsilinə Bülbülün tələbəsi olan Firudin Mehdiyevin sinfində davam edib. 1958-ci ildə təhsilini bitirdikdən sonra bir müddət “Qaya” kvartetində, daha sonra isə Azərbaycan Dövlət Estrada Orkestrində işləyib. Orkestr ləğv olunduqdan sonra sənətkar 8 il işsiz qalıb. Heç bir fəxri ad almadığı üçün səhnədən inciyən Oqtay Ağayev indiki Rəşid Behbudov adına Azərbaycan Dövlət Mahnı Teatrında gözətçi olub. Bundan sonra həmin teatrda solist kimi çalışmağa başlayır. Yaşlı vaxtında səhnəyə qayıdan sənətkar birbaşa Xalq artisti adını alır. [Ekspress.- 2006.- 15 noyabr.- S. 13]
Oqtay Ağayev Əlcəzair, Mərakeş, Polşa, Çexoslovakiya, Bolqarıstan, Rumıniya kimi ölkələrdə qastrollarda olub, keçmiş SSRİ-nin bir çox respublikalarında səfərdə olub. O, sovet dövründə Kreml Sarayında 11 dəfə çıxış edib. Onun oxuduğu 200-dən çox mahnısı lentə yazılıb. [Mədəniyyət.- 2012.- 18 iyul.- S. 13]
Ağayevin repertuarında Tofiq Quliyev, Rauf Hacıyev, Tofiq Babayev kimi bəstəkarların mahnıları yer tutub. O, “Qaytar eşqimi”, “Sən ey uşaqlıq”, “Sənin bircə təbəssümün”, “Yadındamı”, “Azərbaycanım mənim”, “Qayalar”, “İçərişəhər”, “Bir səhər”, “Sevgilim” mahnılarının ifaçısıdır. [Mədəniyyət.- 2012.- 18 iyul.- S. 13]
Sənətkar, həmçinin “Dağlarda döyüş”, “O qızı tapın”, “Şərikli çörək”, “Xatirələr sahili” və başqa filmlərdə mahnıların ifaçısı olub. O, Vaqif Mustafayevin çəkdiyi “Yapon və yaponiyalı” filmində milis işçisi rolunu oynayıb. [https://metbuat.az/melumat/taninmis/79/oqtay-agayev.html]
Oqtay Ağayev 13 noyabr 2006-cı ildə vəfat edib və Yasamal qəbiristanlığında dəfn olunub. [Azərbaycan Milli Ensiklopediyası. Cild I. Bakı-2009]
