AFFA İntizam Komitəsi “Neftçi” və “Qarabağ” klublarını cərimələyib. Bu haqda bu gün, 12 oktyabr tarixində Bakuplus.az Azərbaycan Peşəkar Futbol Liqasının rəsmi saytına istinadən xəbər verir.
“Neftçi”nin iki köməkçi məşqçisi – Sənan Qurbanov və Miodraq Todorov hakimin qərarına etiraz etdiklərinə görə qırmızı vərəqə alıblar. Həmçinin onlara biri şərti olmaqla 2 oyunluq cəza və 3 aylıq sınaq müddəti təyin edilib. “Neftçi” isə buna görə 3000 manat cərimələnib.
Oyunda fotoqraflar mövqelərini dəyişərək icazə verilməyən yerlərdən çəkiliş aparmalarına görə “Neftçi” 500 manat, matçdan sonra meydana kənar şəxslər daxil olduğuna görə, “ağ-qaralar” daha 800 manat cərimə ödəyəcəklər.
Əlavə olaraq, oyunda "miks-zona" düzgün təşkil edilmədiyindən, stadionun tunelində insanlar çox olduğundan və futbolçular avtobusa rahat daxil ola bilmədiklərinə görə “Neftçi”yə xəbərdarlıq edilib.
“Qarabağ” klubu isə futbolçu Toral Bayramovun formasının rəqəmləri fərqli olduğuna görə 1000 manat məbləğində cərimələnib.
Qarşılaşmanın 78-ci dəqiqəsində isə “Köhlən atlılar”ın azarkeşləri kütləvi şəkildə rəqib komandanın ünvanına qeyri-etik ifadələr səsləndiriblər. Bu hal mövsümdə ikinci dəfə yaşandığından, qonaq komanda 500 manat cərimələnib.
Oktyabrın 8-də “Neftçi” – “Qarabağ” oyunu qonaqların 0:2 hesablı qələbəsi ilə yekunlaşmışdı.
