11 aprel məşhur futbol məşqçisi Ağasəlim Mircavadovun doğum günüdür.
Ağasəlim Seyidəhməd oğlu Mircavadov 1947-ci ildə Bakıda anadan olub. Futbol oynamağa 12 yaşında başlayıb. Bakının “Neftçi” klubunun heyətində çıxış edib.
1973-cü ildən məşqçilik edir. 1982-ci ildə dövrün ən böyük məşqçilik məktəblərindən sayılan Moskva Ali Məşqçilik Məktəbini bitirib.
Sovet dönəmində bir neçə dəfə “Neftçi” komandasının sükanı arxasında dayanıb. 1988-ci ildə "Azərbaycanın əməkdar məşqçisi" fəxri adına layiq görülüb.
1991–1996-cı illər aralığında Ağdamın “Qarabağ” klubuna rəhbərlik edib. 1993–1995-ci illər aralığında Azərbaycan milli komandasının baş məşqçi vəzifəsində də çalışıb. Ağasəlim Mircavadov "Şəmkir"lə iki dəfə, “Qarabağ”, “Neftçi”, “Xəzər-Lənkəran” klublarının hər biri ilə bir dəfə ölkə çempionluğunu əldə edib. 2005-c ildə “Neftçi”yə, 2008-ci ildə “Xəzər-Lənkəran”a MDB və Baltikyanı ölkələri çempionlarının “Birlik Kuboku” yarışında qızıl medallar qazandırıb.
2008-ci ilin may ayında Şöhrət ordeninə layiq görülüb. 2018-ci ilin dekabr ayından Prezident təqaüdçüsüdür.
