Şahmatın rapid növü üzrə Azərbaycan çempionatı başa çatıb. Bu haqda bu gün, 5 dekabr tarixində Report məlumat verib.
Kişilərin yarışında Rauf Məmmədov 7 xalla ölkə çempionu olub. Vüqar Əsədli də eyni xal qazansa da, əlavə göstəricilərdə Raufa uduzub. Üçüncü yerdə isə Məhəmməd Muradlı (6,5 xal) qərarlaşıb.
Qadınların yarışında Ləman Hacıyeva 5 xal qazanaraq qalib gəlib. O, əlavə göstəricilərdə Ayan Allahverdiyevanı qabaqlayıb. Üçüncü yeri isə Ülviyyə Fətəliyeva tutub.
Bu gün blits yarışı üzrə ölkə çempionatı başlayır.
Çempionatların əsas məqsədi dekabrın 25-30-da Almatıda (Qazaxıstan) keçiriləcək rapid və blits üzrə dünya çempionatında Azərbaycanı təmsil edəcək şahmatçıları müəyyən etməkdir.
