Bakı şəhər Gənclər və İdman Baş İdarəsinin təşkilatçılığı ilə bu həftə ərzində paytaxtda müxtəlif idman yarışları təşkil olunacaq. Bu haqda bu gün, 27 oktyabr tarixində Bakuplus.az məlumat verir.
Bu gün, 27 oktyabr tarixində 8 Noyabr - Zəfər Gününə həsr olunmuş 2007-2009-ci il təvəllüdlü oğlanlar arasında voleybol üzrə turnir baş tutacaq. Yarışın 90 saylı tam orta məktəbin idman zalında keçirilməsi nəzərdə tutulub.
29 oktyabr – 13 noyabr tarixlərində isə Azərbaycan Texniki Universitetinin idman zalında 2006-2007, 2008-2009, 2010-2011-ci il təvəllüdlü yeniyetmələr arasında basketbol üzrə Bakı şəhər birinciliyi keçiriləcək.
Həmçinin, 29 oktyabr tarixində 2004-2007, 2008 və ondan kiçik təvəllüdlü idmançılar arasında kamandan oxatma üzrə Bakı şəhər birinciliyi Hövsan Olimpiya İdman Kompleksində baş tutacaq.
Daha öncə, oktyabrın 26-sı Xətai rayon məktəbliləri arasında stritbol üzrə turnir keçirilib.
