Bakıda “Baku Open 2023” Beynəlxalq Şahmat Festivalı keçiriləcək. Bu haqda bu gün, 15 mart tarixində Bakuplus.az Azərbaycan Şahmat Federasiyasına istinadən məlumat verir.
Ümummilli lider Heydər Əliyevin 100 illik yubileyinə həsr olunmuş turnir "Baku Crystal Hall"da keçiriləcək.
Yarışlar iştirakçıların reytinqinə uyğun olaraq üç qrupda (A, B və C) keçiriləcək. Hər üç qrupda İsveçrə sistemi üzrə 9 tur keçiriləcək.
Turnirin ümumi mükafat fondu 55 min ABŞ dollarıdır. “A” qrupunda yarışmanın qalibi kubok və 12.000 ABŞ dolları məbləğində pul mükafatı ilə təltif olunacaq. “C” qrupunda bütün yaş qruplarının qalibləri daha sonra Rumıniyada keçiriləcək gənclər arasında Avropa çempionatında iştirak edəcəklər.
Müsabiqənin birinci mərhələsi mayın 4-də saat 14:30-da başlayacaq. Festival mayın 12-də başa çatacaq.
