Futbol üzrə Azərbaycan Premyer liqasının 33-cü turu çərçivəsində baş tutan “Neftçi” – “Kəpəz” (2:2) matçından sonra mediada belə bir xəbər yer aldı – “Emin Mahmudov Kazbek Tuayevə çatıb”. İzah verək: 33 yaşlı yarımmüdafiəçi "Neftçi" klubunda 60-cı qolunu vuraraq 84 yaşlı Tuayevin göstəricisini təkrarlayıb.
Emin 60 qolunu "Neftçi"də keçirdiyi 252-ci qarşılaşmada vurub. O, Premyer Liqada 44, Azərbaycan Kubokunda 7, avrokuboklarda 9 dəfə fərqlənib.
İndi isə keçək əsas məsələyə. Qeyd etdiyimiz kimi, Mahmudov klub səviyyəsində vurulan qollara görə Tuayevlə bərabərləşib. Statistika quru rəqəmlərin tablosudur, onların arxasında nə gizləndiyi çox zaman pünhan qalır. Biz isə nəzər saldığımız məsələdə pərdə arxasında qalan bəzi məqamlara diqqət çəkmək istərdik.
Bilməyənlər üçün deyək, bilənlər üçün təkrar edək: Kazbek Tuayev Azərbaycan futbolu tarixində iz buraxan azsaylı futbolçulardan biridir. Kazbek Aliyeviç ölkə futbolunun ən yüksək nailiyyəti – 1966-cı il SSRİ çempionatında “Neftçi”nin bürünc medal qazanmasının bilavasitə iştirakçısıdır. Başqa sözlə desək, futbolumuzun canlı əfsanəsidir. Bundan savayı, 3 dəfə - 1963, 1966 və 1967-ci il mövsümlərində Tuayev SSRİ-nin ən yaxşı 33 futbolçusu sırasında yer almağı bacarıb. Sonuncu statistik məlumatın üzərindən sadəcə ötməyək. Düşünək. SSRİ-nin ən yaxşıları sırasında “Neftçi”nin üzvü! Bu nə deməkdir? Yəni Rusiya, Ukrayna, Belarus, Gürcüstan, Orta Asiya, Baltikyanı ölkələrin təmsilçiləri ilə mübarizədə bakılı daha yüksək performans göstərib! Təsəvvür edirsiniz bunu? Əlbəttə, indi bunu, futbolumuzun can üstündə olması fonunda təsəvvür etmək çətindir. Amma fakt faktlığında qalır. Tuayev bunu bacarmışdı, özü də 3 dəfə...
Sözümüzün canı nədir? Əlbəttə, Emin Mahmudov çalışqan, müasir futbol həyatımızın parlaq simalarındandır. Amma ədalət naminə etiraf etməliyik: Mahmudovla Tuayevin nəticələrini bir tərəzinin gözünə qoymaq yanlış olardı. Ən azından onların hansı rəqiblərlə üz-üzə gəldiklərini, hansı komandaların qapılarına yol tapmalarını nəzərə alaraq. Əgər Mahmudov bunu Azərbaycan çərçivəsində edibsə, Tuayevin nailiyyət coğrafiyası müqayisə olunmaz dərəcədə daha genişdir. Bir var “Kəpəz”ə, “Səbail”ə qol vurmaq, bir də var Kiyev “Dinamo”suna, Moskva “Spartak”ına...
Odur ki, bəzi statistik nəticələri işıqlandırarkən, qısa izahat vermək də yerinə düşərdi. Nəzər saldığımız məsələdə bəzi məqamları incələməmizə görə, zənnimizcə, Emin bizdən inciməz. Tuayevə isə Azərbaycan futboluna xidmətlərə görə bir daha minnətdarlığımızı bildirmiş olduq.
Vüsal Əliyev
