“Neftçi” komandasının ev oyunlarını keçirdiyi “Neftçi Arena” müvəqqəti olaraq təmirə bağlanır. Bu haqda bu gün, 14 avqust tarixində Bakuplus.az xəbər verir.
Arenanın ot örtüyünün hazırda oyunları qəbul etməyə tam hazır olmadığı, anomal istilər səbəbindən qazonunun keyfiyyətinin istənilən səviyyəyə çatdırılmasında problemlər yarandığı üçün stadion müvəqqəti bağlanıb.
“Neftçi” rəhbərliyi arenanın yenidən təmirə bağlanmasına, ot örtüyünün ideal səviyyəyə çatdırılmasına qərar verib. Bununla əlaqədar klub tərəfindən Peşəkar Futbol Liqasına rəsmi müraciət ünvanlanıb. Yenilənmə prosesinin Azərbaycan Premyer Liqasının VII turunda “Qarabağ”la keçirəcək ev oyununa qədər tamamlanması nəzərdə tutulub.
Bu səbəbdən tərəflərin razılığına əsasən, “Neftçi”nin ölkə çempionatının III turunda, avqustun 18-də “Sabah”la keçirəcəyi ev oyunu “Liv Bona Dea Arena”da təşkil olunacaq. Digər razılaşmaya görə, Peşəkar Futbol Liqasının təsdiqi əsasında “Şamaxı” ilə ev matçlarının yeri dəyişdirilib. V turda keçirilməsi nəzərdə tutulan “Neftçi” – “Şamaxı” görüşü Bakıda yox, Şamaxıda oynanılacaq. İkinci dövrənin “Şamaxı” – “Neftçi” matçı isə “Neftçi Arena”da baş tutacaq.
