“Neftçi” PFK rəqib azarkeşlər üçün xüsusi sektor ayıracaq. Bu haqda bu gün, 13 noyabr tarixində Bakuplus.az kluba istinadən xəbər verir.
Belə ki, Rusiyanın “Zenit” klubu ilə keçiriləcək yoldaşlıq görüşü zamanı qonaq komandanın azarkeşləri üçün xüsusi sektor ayrılacaq.
“Həm ölkəmizdə olan, həm də qonşu ölkədən gələcək azarkeşlərin təhlükəsizliyinin yüksək şəkildə təmin olunması və oyun zamanı azarkeşlər arasında yarana biləcək mümkün arzuolunmaz halların qarşısını almaq məqsədilə müvafiq preventiv tədbirlərin görülməsi planlaşdırılır”, – deyə paylaşımda qeyd olunub.
Bundan əlavə, “Neftçi” azarkeşləri üçün nəzərdə tutulacaq digər sektorlarda “ağ-qaralar”a aid olmayan, digər komandalara və başqa ölkələrə məxsus atributları daşıyan azarkeşlərin görüşü izləmələri məhdudlaşdırılacaq. Belə hallara rast gəlindikdə həmin azarkeşlərin dərhal stadiondan çıxarılacağı bildirilib.
“Neftçi” - “Zenit” oyunu 18 noyabr saat 21:00-da “Neftçi Arena”da keçiriləcək.
