Bakılı şahmaçı Teymur Rəcəbov Moskvada təşkil olunacaq “Şahmat Ulduzları 3.0” turnirində ənənəvi olaraq iştirak edəcək. Bu haqda bu gün, 9 noyabr tarixində Bakuplus.az məlumat verir.
Turnir dekabrın 14-dən 19-dək davam edəcək. Yarışın mükafat fondu 15 milyon rubldur (təxminən 300 min manat).
İştirakçılar arasında Sergey Karyakin, Aleksandr Qrişuk, Fransisko Valyexo, Vladislav Artemyev, Yevgeni Tomaşevski, Ernesto İnarkiev, Raunak Sadhvani, Aleksandra Qoryaçkina və Yekaterina Laqno da var.
Turnirin həmtəşkilatçıları – “Yeni Şahmat” (“Новые Шахматы”) və “Agalarov Development” şirkətləri intellektual idmana dəstək və gənc nəsillə işləməyi ən mühüm vəzifə hesab edir.
“Şahmat Ulduzları” layihəsi çərçivəsində gənc şahmatçılar nəsli ilə işləməyə və gələcəyin şahmat ulduzlarına dəstək olmağa xüsusi diqqət yetirilir. Rusiya Şahmat Məktəbi ilə birlikdə “VEGAS” ticarət-əyləncə kompleksi şəbəkəsində 15 yaşa qədər uşaqlar üçün silsilə təsnifat turnirləri təşkil edilmişdir.
Turnirin təntənəli açılışı dekabrın 13-də baş tutacaq, idmançıların yarışları isə dekabrın 14-də başlayacaq.
Turnirin qalibləri iki növ – blits və rapid üzrə nəticələrə görə müəyyən ediləcəklər. Uşaqlar dörd yaş kateqoriyasında, oğlanlar və qızlar üçün ayrı-ayrı kateqoriyalar üzrə mükafatlandırılırlar. Uşaq turnirləri ilə yanaşı, qrosmeysterlərdən açıq ustad dərsləri təşkil olunacaq.
