Bakının Nəsimi rayonu, Səməd Vurğun küçəsində ağır xəsarətlərlə nəticələnən yol qəzası baş verib. Bu haqda bu gün, 14 dekabr tarixində APA məlumat verib.
“Toyota” markalı avtomobilin sürücüsü, 20 yaşlı Mirzəli Aydəmirov idarəetməni itirib, nəticədə avtomobil yolun kənarında dayanan “Chevrolet” markalı avtomobilə, daha sonra isə eyni istiqamətdə hərəkətdə olan "Daewoo" markalı avtomobilə çarpılıb.
Zərbənin təsirindən “Chevrolet” markalı avtomobil alışıb.
Hadisə yerinə Fövqəladə Hallar Nazirliyinin əməkdaşları cəlb olunublar. Yanğın söndürülüb.
Qəza nəticəsində “Toyota” markalı avtomobilin sürücüsü, sərnişinləri - 20 yaşlı Kənan Quliyev və Şöhrət Aydəmirov ağır bədən xəsarətləri alaraq Kliniki Tibbi Mərkəzə yerləşdiriliblər.
Hadisə yerinə Nəsimi Rayon Polis İdarəsinin əməkdaşları cəlb olunub. Təhlükəsizlik məqsədilə yol müvəqqəti olaraq bağlanıb. Hüquq-mühafizə orqanlarının əməkdaşları “Toyota” markalı avtomobilin sürücüsünün yüksək sürətlə manevr edərək qaydaları pozduğunu bildiriblər.
[URIS id=83011]
