Masallı rayonunun Qarğalıq kəndində güllələnmə hadisəsi baş verib. Bu haqda 17 dekabr axşam saatlarında Report məlumat verib.
52 yaşlı Balayar Ağamalıyev odlu silahdan atəş nəticəsində xəsarət alıb. Yaralı Lənkəran Rayon Mərkəzi Xəstəxanasına döş qəfəsinin sol nahiyəsinin odlu silah yarası diaqnozu ilə çatdırılıb. Vəziyyəti ağır olduğundan o, reanimasiya şöbəsinə yerləşdirilib.
İlkin məlumata görə, Ağamalıyevin Bakıda yaşadığı bildirilir. O, həmin kənddə yeni ev tikdiyi üçün qardaşı ilə mübahisə edib. Hadisə evin həyətində baş verib. Lakin hadisənin təfərrüatları hazırda məlum deyil. Onun necə və kim tərəfindən vurulduğunu heç kim görməyib.
Faktla bağlı araşdırma aparılır.
