Bakının Binəqədi rayonunda 13 yaşlı uşaq Binəqədi rayon İcra Hakimiyyətinin müvafiq komissiyasına müraciət edib. Onun sözlərinə görə, o və xəstə anası ögey ata tərəfindən mütəmadi olaraq döyülüblər. Bu haqda bu gün, 29 dekabr tarixində Lent.az məlumat verib.
Məsələni rayon Polis İdarəsinin 4-cü Polis Şöbəsinin əməkdaşları nəzərətə götürüblər. Ailə kirayə qaldığı və tez-tez yaşadığı ünvanları dəyişdiyinə görə onun axtarışları çətinləşib. Polis əməkdaşları və müvafiq qeyri-hökümət təşkilatının (QHT) işçiləri ailəni taparaq mənzilinə baxış keçiriblər.
Yoxlama zamanı uşağın iddiaları təsdiqlənib. Onun bədənində döyülmə əlamətləri aşkar olunub, tibbi ekspertiza da döyülmə faktını təsdiq edib.
Faktla bağlı araşdırma aparılır, həmin şəxsin əməllərinə qiymət veriləcək. Hazırda qadın və uşağı İcra Hakimiyyəti ilə QHT-nin nəzarətindədirlər.
