Bakıda 19 il əvvəl qətl törətməkdə təqsirləndirilən Bəxtiyar Dadaşovun məhkəməsi yekunlaşıb. Bu haqda 13 iyun tarixində Bakuplus.az Oxu.az-a istinadən məlumat verir.
Bakı Ağır Cinayətlər Məhkəməsinin hakimi Eldar İsmayılovun qərarına əsasən, o, 7 il 3 ay 20 gün müddətinə azadlıqdan məhrum edilib.
Hadisə Suraxanı rayonu, Əmircan qəsəbəsində 29 dekabr 2003-cü il tarixində baş verib. Bəxtiyar Dadaşov və tanışı İlham Məmmədov pul qazanmaq məqsədilə “Fəvvarələr meydanı” ərazisində taksi sürücüsünü oğurlayıblar.
Onlar taksi fəaliyyəti ilə məşğul olan Ramiz Əmirovun “QAZ 24” markalı avtomobilinə minib Əmircan qəsəbəsinə gediblər. Ünvana çatdıqdan sonra hər ikisi sürücüyə müxtəlif dərəcəli bədən xəsarətləri yetirib və pulunu ələ keçiriblər. Bundan əlavə, Əmirovun həyat yoldaşına zəng edib ərini oğurladıqlarını deyib, sərbəst buraxılması üçün pul tələb ediblər. Amma bir müddət sonra ifşa olunmaqlarından qorxaraq Ramiz Əmirovu boğaraq öldürüblər.
Törədilmiş cinayət yalnız 18 il sonra polisin keçirdiyi kompleks istintaq-əməliyyat tədbirləri nəticəsində üzə çıxıb. 15 dekabr 2021-ci il tarixində Bəxtiyar Dadaşov saxlanılıb və Cinayət Məcəlləsinin 120.2.1, 120.2.6, 120.2.9 və 120.2.11-ci maddələri ilə ittiham olunaraq barəsində məhkəmənin qərarı ilə həbs qətimkan tədbiri seçilib. Cinayətin digər iştirakçısı İlham Məmmədov vəfat etdiyinə görə onun cinayət işi üzrə icraata xitam verilib.
