Üçqat dünya çempionu, Əməkdar idman ustası Elman Mirzəyev həbs olunub. Nərimanov Rayon Məhkəməsi istintaq zamanı onun barəsində 2 ay müddətinə həbs qətimkan tədbiri seçib. Bu haqda bu gün, 16 iyun tarixində Bakuplus.az Qafqazinfo-ya istinadən məlumat verir.
47 yaşlı Elman Mirzəyev “külli miqdarda ziyan vurma, dələduzluq” maddəsi ilə ittiham olunur.
Bildirilir ki, cinayət işi çərçivəsində 3 vətəndaş zərərçəkmiş kimi tanınıb. 2021-ci ildə Elman Mirzəyev A.Ağayevə məxsus “Land Rover” markalı avtomobili satacağını vəd edərək ondan pul alıb, lakin bu, baş verməyib və bununla da 263.500 manat məbləğində ziyan vurulub.
Daha sonra Mirzəyev dostu M.Əliyevdən “Range Rover Sport” və “Bentley” markalı avtomobilləri xaricdən gətirəcəyini vəd edərək 289.000 min manat pul alıb. Amma 127.500 manatı mənimsəyərək vədinə əməl etməyib.
Digər iddiaçı M.Quluzadədir. Mirzəyev ona daşınmaz əmlakın “çıxarışını” almaqda köməklik edəcəyini vəd edərək ondan 42.000 manat alıb. Lakin o, bu vədinə də əməl etməyib.
Zərərçəkmişlər onu da iddia edirlər ki, Elman Mirzəyev uzun müddət vəzifəli şəxslərin və nüfuzlu şəxslərin adlarını çəkərək məsuliyyətdən yayınmağa, onların vasitəsilə istintaqa təsir göstərməyə çalışıb.
Hazırda cinayət işi üzrə istintaq davam etdirilir.
