Bakıda və Abşeron yarımadasında noyabrın 10-dan 11-nə keçən gecə saatlarında güclü külək nəticəsində 11 nəfər xəsarət alıb, binalara və nəqliyyata ciddi maddi ziyan dəyib.
Xəsarət alanlardan beşi kişi, altı nəfər isə qadındır. Onlardan birinə yerində yardım edilib, biri yardımdan imtina edib, doqquz nəfər isə xəstəxanaya çatdırılıb.
Abşeron rayonu Güzdək qəsəbəsində daha bir nəfər xəsarət alıb. 27 yaşlı Rahib Nehmətov küçədə gəzərkən evdən qopan dam örtüyünün bir parçası onun qarnına kəsici və deşici xəsarət yetirib. O, 1 saylı şəhər klinik xəstəxanasının reanimasiya şöbəsinə yerləşdirilib.
Noyabrın 10-u axşam və 11-ə keçən gecə əsən güclü külək nəticəsində 93-dən çox ağacın aşması halları qeydə alınıb, ağaclar 10 avtomobilə ciddi ziyan vurub. Həmçinin, ən azı 4 yük avtomobili magistral yollara aşıb.
Güclü külək Milli Məclisin binasının fasadına ziyan vurub, Yasamal rayonunda “Qlobus Centre” biznes mərkəzinin binasından pəncərələrin şüşələri yola düşüb.
Binə qəsəbəsində hava şəraiti nəticəsində işıqfor dirəyi əyilib.
Bakıda hava şəraitinin qeyri-sabit, küləkli olacağı noyabrın 12-dək gözlənilir.
