Xarici ölkələrə aşağı qiymətə aviabilet və turistik paketlər təşkil edəcəyi adı ilə vətəndaşları aldadan şəxs həbs edilib. Bu haqda bu gün, 10 avqust tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Polisə daxil olan məlumata görə, naməlum şəxs vətəndaşları xarici ölkələrə dəyərindən qat-qat aşağı qiymətə aviabilet və turistik paketlərin satışını təşkil edəcəyi adı altında aldadaraq onların pul vəsaitlərini ələ keçirib.
Keçirilən tədbirlər nəticəsində qanunsuz əməllərin Bakı şəhər sakini Mələk Zeynalova tərəfindən törədildiyi məlum olub.
İlkin məlumata görə, Zeynalova WhatsApp-da qrup yaradaraq insanlara xarici ölkələrə aviabilet və aviaturlar təşkil edib. Vətəndaşlar onlayn ödəniş sistemi vasitəsilə ona pul göndəriblər. Zeynalova həmin vəsaitləri nağdlaşdıraraq şəxsi tələbatlarına xərcləyib. Bununla da Mələk Zeynalova zərərçəkən şəxslərə ümumilikdə 300 min manat məbləğində maddi vurub.
Faktla bağlı “Külli miqdarda ziyan vurmaqla dələduzluq etmə” maddəsi ilə cinayət işi açılıb, Zeynalova həbs olunub. Mələk Zeynalovanın əməllərindən zərər çəkən şəxslər bu barədə Daxili İşlər Nazirliyinə müraciət edə bilərlər.
