Bakıda dayısının evinə basqın edərək quldurluq törədən şəxs və dəstənin daha 3 üzvü saxlanılıblar. Bu haqda BakuPlus.az Daxili İşlər Nazirliyinə istinadən bu gün, 10 dekabr tarixində xəbər verir.
Xətaidə evlərdən birinə basqın edərək quldurluq əməli törədən dəstə üzvləri: Ramazan Kərimov, Əli Vəliyev, Orxan Musəvi və İlqar Xəlilov saxlanılıblar. Onlar evdən 50 min dollar, 1900 manat və ümumi dəyəri 20 min manat olan qızıl-zinət əşyalarını ələ keçiriblər.
Ramazan Kərimov dayısının evində külli miqdarda pul olması barədə digər qohumu Əli Vəliyevə xəbər verib. Bundan sonra o, tanışları Orxan Musəvi və İlqar Xəlilovla həmin mənzilə basqın etmək barədə razılığa gəlib. Ramazan Kərimov dəstə üzvlərinə dayısının və ailənin digər üzvlərinin səhər saatlarında evdən çıxdıqları, mənzildə isə ailənin böyük oğlunun tək qaldığı barədə məlumat verib.
Noyabr ayının 21-də dəstə üzvləri həmin mənzilə özlərini poçt əməkdaşları kimi təqdim edərək daxil olublar. Onlar ev sahibinin oğlunun üz nahiyəsinə yumruqla bir neçə dəfə vurub və əllərində olan bıçaqla sonuncunun həyatı və sağlamlığı üçün təhlükəli zorakılıq tətbiq etməklə mənzilə basqın ediblər.
Ramazan Kərimov, Əli Vəliyev, Orxan Musəvi və İlqar Xəlilov barəsində toplanan materiallar Xətai RPİ-nin İstintaq Şöbəsinə göndərilib.
[caption id="attachment_82673" align="alignnone" width="640"]
Foto Daxili İşlər Nazirliyinin rəsmi Youtube kanalı[/caption]
