Ermənistan Silahlı Qüvvələrinin iki snayperi zərərsizləşdirilib - YENİLƏNİB
Caliber.az-dan verilən məlumata görə, Azərbaycan Silahlı Qüvvələrinin cavab tədbirləri nəticəsində Laçın sərhəd-buraxılış məntəqəsi istiqamətində Azərbaycan Respublikası Dövlət Sərhəd Xidmətinin (DSX) şəxsi heyətini atəşə tutan Ermənistan Silahlı Qüvvələrinin 2 snayperi məhv edilib.
14:49 - Ermənistan hərbi silahlıları Laçın sərhəd-buraxılış məntəqəsinin atəşə tutulması ilə bağlı açıqlama verib - YENİLƏNİB
“DSX-nin hərbi qulluqçularına qarşı müxtəlif çaplı odlu silahlardan açdıqları atəşlər nəticəsində DSX-nin hərbi qulluqçusu, gizir Elşən Rüstəmov güllə yarası xəsarətləri alıb.
Elşən Rüstəmov hərbi hospitala yerləşdirilib və hazırda vəziyyəti stabildir.
Faktla bağlı Baş Prokurorluğun İstintaq idarəsində Cinayət Məcəlləsinin 29,120.2.1, 29,120.2.3, 29,120.2.4 və 29,120.2.11, 29,120.2.12-ci (bir qrup şəxs tərəfindən xidməti vəzifəsini yerinə yetirən şəxsi ümumi təhlükəli üsulla, terrorçuluqla əlaqədar və milli düşmənçilik niyyəti ilə öldürməyə cəhd), 214.2.1. 214.2.3 və 214.2.4-cü (qabaqcadan əlbir olan bir qrup şəxs tərəfindən odlu silahdan istifadə etməklə ağır nəticələrə səbəb olan terrorçuluq) maddələri ilə cinayət işi başlanılaraq ibtidai istintaq aparılır”, - Baş Prokurorluğun məlumatında qeyd edilib.
11:30 - Ermənistan hərbi silahlıları “Laçın” sərhəd-buraxılış məntəqəsini atəşə tutublar: nazirlikdən açıqlama
Müdafiə Nazirliyi bu gün səhər saatlarında Ermənistan silahlı qüvvələri tərəfindən Laçın sərhəd-buraxılış məntəqəsi istiqamətində atəş açması ilə bağlı məlumat yayıb.
"İyunun 15-i saat 08:35-dən saat 10:30-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri kənd təsərrüfatı işləri adı altında Azərbaycan Ordusunun Füzuli rayonu istiqamətində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər.
Bölmələrimiz tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.
Bundan başqa, saat 08:45 radələrində qeyri-qanuni erməni silahlı dəstələrinin üzvləri Ordumuzun Füzuli rayonu istiqamətində yerləşən mövqelərini atıcı silahlardan atəşə tutub.
Azərbaycan Ordusunun bölmələri tərəfindən qeyd olunan istiqamətdə adekvat cavab tədbirləri görülüb", - Müdafiə Nazirliyinin açıqlamada deyilir.
09:59 - Ermənistan hərbi silahlıları “Laçın” sərhəd-buraxılış məntəqəsini atəşə tutublar
Bu gün səhər saatlarında Ermənistan silahlı qüvvələri tərəfindən Laçın sərhəd-buraxılış məntəqəsi istiqamətində atəş açılıb. Atışma üzbəüz erməni postundan Azərbaycanın dövlət bayrağının qaldırılma mərasimi zamanı həyata keçirilib. Bu haqda bu gün, 15 iyun tarixində Bakuplus.az Caliber.az-a istinadən məlumat verir.
Atəş nəticəsində Azərbaycan Dövlət Sərhəd Xidmətinin hərbçisi yaralanıb. Onun vəziyyəti stabil qiymətləndirilir, bütün lazımi tibbi yardım göstərilir.
Hazırda vəziyyət Azərbaycan bölmələrinin nəzarətindədir, atışmalardan sonra erməni hərbçiləri postlarını tərk ediblər.
Əlavə məlumat veriləcək.
