"Falçı" adı ilə qadından 2 milyon manat alan ər-arvada 23 il cəza istənilib. Bu haqda 2 dekabr tarixində Trend xəbər verib.
Ər-arvad instagram üzərində “Ekstrasens Maya” səhifəsi açaraq falçılıq etməsi barəsində elan veriblər. Onun xidmətindən Bakı şəhər sakini Rəna Ağarzayeva istifadə edib. Bəxtin açılması üçün 2 il ərzində dələduzlara 2 milyon manat pul verib.
Dələduzların qurbanı olduğunu nəhayət başa düşən Ağarzayeva polisə müraciət edib. Polisin keçirdiyi əməliyatdan sonra Şəfəq İsmiyeva və həyat yoldaşı Ceyhun Zeynallı saxlanılıblar. Onlar Cinayət Məcəlləsinin “Xüsusilə külli miqdarda ziyan vurmaqla dələduzluq” maddəsilə ittiham olunublar.
Bakı Ağır Cinayətlər Məhkəməsində falçılıqla məşğul olan ər-arvadın məhkəmə istintaqı yekunlaşıb. Prokuror İsmiyevaya 10 il 6 ay, Zeynallıya isə 13 il həbs cəzası verilməsini istəyib.
