Paytaxtın 1 nömrəli Respublika Psixiatriya Xəstəxanasında döyülən pasient dünyasını dəyişib. Bu haqda Oxu.az xəstənin qardaşına istinadən bu gün, 16 dekabr tarixində məlumat verib.
Mərhumun qardaşının sözlərinə görə, o, ötən gün gecə saatlarında vəfat edib.
Səhiyyə Nazirliyi açıqlamasında hadisənin xəstələr arasında mübahisə zəminində baş verdiyini bildirib.
Bundan əvvəl, dekabrın 13-də xəstənin psixiatriya xəstəxanasında ağır döyüldüyü bildirilmişdir. Nəticədə o, komaya düşmüş və xəstəxanaya yerləşdirilmişdir. Hadisə ilə bağlı araşdırmalara başlanılıb.
