Xırdalanda Heydər Əliyev adına parkda iyunun 8-də qadın hündürlükdən yıxılaraq ölüb. Bu haqda bu gün, 10 iyun tarixində Bakuplus.az Qafqazinfo-ya istinadən məlumat verir.
12 yaşlı qızı Cəmilə ilə əylənən 36 yaşlı Minayə Nuriyeva dairəvi hərəkət edən beş qoşqudan ibarət, delfinşəkilli karuselin ikinci qoşqusundan yıxılıb. Şahidlərin sözlərinə görə, uşağın düşən papağını qaldırmaq istəyən ananın əli dəmirə ilişib. Nəticədə qadın oturduğu yerdən sürüşərək aşağı düşüb.
Qadın qarının küt travması, daxili qanaxma, qapalı kəllə-beyin travması, alt çənə sınığı, sağ bazunun açıq sınığı, II və III dərəcəli travmatik şok diaqnozu ilə Respublika Klinik Xəstəxanasına çatdırılıb.
Həkimlərin səylərinə baxmayaraq, qadın ötən gün səhər saatlarında xəstəxanada dünyasını dəyişib.
