Baş Prokurorluq Bakıda 18 il əvvəl baş verən qətlin təfərrüatlarını açıqlayıb. Bu haqda 17 dekabr tarixində Baş Prokurorluğun Mətbuat xidməti məlumat verib.
Suraxanı rayonu, Əmircan qəsəbəsində 29 dekabr 2003-cü il tarixində “Qaz-24” markalı avtomobilin içində Ramiz Əmirovun meyiti aşkarlanıb. Polisin keçirdiyi istintaq-əməliyyat tədbirləri nəticəsində məlum olub ki, “Fəvvarələr meydanı” ərazisində Bəxtiyar Dadaşov və tanışı İlham Məmmədov pul qazanmaq məqsədi ilə taksi sürücüsünü oğurlayıblar.
Onlar taksi fəaliyyəti ilə məşğul olan Ramiz Əmirovun “Qaz 24” markalı avtomobilinə minib Əmircan qəsəbəsinə gediblər. Ünvana çatdıqdan sonra hər ikisi sürücüyə müxtəlif dərəcəli bədən xəsarətləri yetiriblər və pulunu ələ keçiriblər. Bundan əlavə Əmirovun arvadına zəng edib ərini oğurladıqlarını deyib, sərbəst buraxılması üçün pul tələb ediblər. Amma bir müddət sonra Bəxtiyar Dadaşov və İlham Məmmədov ifşa olunmaqlarından qorxaraq Ramiz Əmirovu boğaraq öldürüblər.
Törədilmiş cinayət yalnız 18 il sonra, polisin keçirdiyi kompleks istintaq-əməliyyat tədbirləri nəticəsində üzə çıxıb. 15 dekabr 2021-ci il tarixində Bəxtiyar Dadaşov saxlanılıb və o, 120.2.1, 120.2.6, 120.2.9 və 120.2.11-ci maddələri ilə ittiham olunaraq barəsində məhkəmənin qərarı ilə həbs qətimkan tədbiri seçilib. Cinayətin digər iştirakçısı İlham Məmmədov vəfat etdiyinə görə, onun cinayət işi üzrə icraata xitam verilib.
Faktla bağlı istintaq-əməliyyat tədbirləri aparılır.
