Bakının Suraxanı rayonunda polis əməkdaşları tərəfindən narkotik vasitələrin təsiri altında avtomobil idarə edən sürücü aşkar edilib. Bu haqda bu gün, 20 dekabr tarixində Bakuplus.az Daxili İşlər Nazirliyinə (DİN) istinadən məlumat verir.
Bülbülə qəsəbəsi sakini Fuad Əsgərli idarə etdiyi “VAZ-2106” markalı avtomobillə hərəkətdə olarkən ona “saxla” işarəsi verilib. Sürücü yol polisinə tabe olmayıb və hərəkətinə davam edib.
Rayonun Ramana qəsəbəsində Fuad Əsgərli idarəetməni itirərək avtomobili “Mercedes” markalı avtomobilə çarpıb. İlkin araşdırma zamanı sürücü avtomobili narkotik vasitənin təsiri altında idarə etdiyini etiraf edib.
Təyin edilmiş ekspertiza nəticəsində Fuad Əsgərlinin avtomobili narkotikin təsiri altında idarə etməsi bir daha sübuta yetirilib. Həmçinin həyata keçirilmiş istintaq-əməliyyat tədbirləri zamanı sürücünün Suraxanı rayonu ərazisində dəfələrlə avtoxuliqanlıq edərək, avtomobilin dövlət nömrə nişanını dəyişdirərək yol hərəkəti qaydalarını kobud şəkildə pozması müəyyən edilib.
Sürücü barəsində protokol tərtib edilib. Toplanmış materiallar məhkəməyə göndərilib.
