Xalq artisti Ağadadaş Ağayev "Həftənin qonağı" proqramında pul, sənət və şəxsi kolleksiyası barədə danışıb. O, pul haqda belə deyib: "Deyirlər, pul əl çirkidir — bunu deyənin başı işləmir. Pul necə əl çirkidir? Pul insana cəsarət verir, qorxunu yox edir. Pulsuzluq isə qüssə gətirir, sevgilini başqasına yönəldir, ata-ananın gözündən salır. Hər işin bir qiyməti var; əsas odur ki, pulun qulu olmayasan. Əgər pul yalnız nəfsinə xidmət edəcəksə, o, səni məhv edər."
Müğənni eyni zamanda evində yığılan kolleksiyadan və sənətə münasibətindən danışıb: "Rəssamlığı sevmişəm, amma musiqini seçdim. Evimdə illərdir cızma-qara və rəsm əsərləri, 250–300 illik antik əşyalar var — harasa getmişəmsə, oradan almışam, dostlarım da hədiyyələr göndərib."
Ağayev var-dövlətindən və əmlaklarından da söz açıb. O bildirib ki, şadlıq evi indi mərasim zalı kimi fəaliyyət göstərir və əvvəllər bizneslə bağlı təcrübələrindən danışıb: "Bir müddət qızımı müalicəyə aparmalıydım, ona görə obyektimi icarəyə verdim. 15 il icarəyə verdim, sonra icarəçi obyekti mərasim zalına çevirmək istədi — dedim, pulunu verirsən, nə istəyirsən et. Sovet dövründə müəyyən miqdarda pulum vardı, maşınlar, mənzillər almışdım; hətta bir binanın blokunu da almışdım. Amma ən vacibi — evində qızılın olmasıdır; çətin vaxtda tələsib onu satmamalısan."
