Bakının XX-XXI əsrlər Azərbaycan Rəngkarlığı Muzeyində 28 sentyabr, saat 19:00-da ukraynalı sənətşünas Konstantin Doroşenkonun "Bu xaos deyil: Ukrayna və Azərbaycan müasir incəsənətində humanizm" mühazirəsi keçiriləcək. Bu haqda bu gün, 23 sentyabr tarixində Bakuplus.az məlumat verir.
Tədbir YARAT müasir incəsənət məkanı tərəfindən təşkil olunur. Mühazirə müəllif tərəfindən, Azərbaycan rəssamı Rəşad Ələkbərovun Venesiya Biyennalesində (2015) nümayiş olunan "Bu xaos deyil" əsərindən təəssüratlanaraq hazırlanıb.
Tədbir zamanı, həmçinin K.Doroşenko 2015-ci ildə yazılmış “Son dəmir dövrünün sonu” kitabına istinad edərək Azərbaycanın (Səbinə Şıxlinskaya, Rəşad Ələkbərov, Babi Bədəlov, Rəna Əfəndi, Orxan Hüseynov) və Ukraynanın müasir rəssamları haqqında danışacaq.
Mühazirə rus dilində keçiriləcək. İştirak etmək üçün qeydiyyatdan keçmək lazımdır.
Sənətşünas, media üzrə menecer, müasir incəsənət kuratoru və publisist Konstantin Doroşenko 2011-ci ildə "Art Ukraine" jurnalına əsasən, son 10 ilin ən yaxşı ukraynalı sənətşünası və 5 ən nüfuzlu müasir incəsənət kuratorları siyahısına daxil edilib. 2015-ci ildə o, Azərbaycan şairi Mikayıl Müşfiq adına mükafata layiq görülüb.
