Sabah, sentyabrın 17-də Azərbaycan Milli Xalça Muzeyində “Geyimlərin cazibəsi: Belqrad Etnoqrafiya Muzeyinin sərgisi” ekspozisiyası açılacaq. Bu haqda bu gün, 16 sentyabr tarixində Bakuplus.az muzeyin mətbuat xidmətinə istinadən məlumat verir.
Azərbaycan və Serbiya arasında diplomatik əlaqələrin qurulmasının 25-ci ildönümünə həsr olunmuş sərgidə Belqrad Etnoqrafiya Muzeyinin kolleksiyasından 64 eksponat nümayiş etdiriləcək.
Sərgidə Balkan yarımadasında və Orta Dunay ovalığında istifadə olunan 19-20-ci əsrlərə aid qadın və kişi geyimləri təqdim olunacaq. Bunlar şəhər, kənd, gündəlik və bayram geyimlərinin nümunələridir.
Serbiyanın ölkəmizdəki səfirliyinin dəstəyi, Azərbaycan Mədəniyyət Nazirliyi, Serbiya Respublikasının Mədəniyyət və İnformasiya Nazirliyi, Azərbaycan Milli Xalça Muzeyi və Belqrad Etnoqrafiya Muzeyinin birgə təşkilatçılığı ilə keçirilən sərgi oktyabrın 16-dək davam edəcək.
Sərgi çərçivəsində uşaqlar və böyüklər üçün serb xalqına aid ənənəvi tikmə naxışlarının tətbiqi ilə “özün rənglə”, fetr üzərində qaytanla sancma və sanama tikmələri üzrə ustad dərsləri keçiriləcək.
