Ötən gün Bakıda “Kiçik bir millət - böyük Animasiya” adlı festivalın açılışı olub. Tədbir “Fairmont Baku” otelində Latviya Respublikasının Azərbaycandakı səfirliyi və “Park Cinema”nın birgə təşkilatçılığı ilə baş tutub.
Açılışdan əvvəl Latviyanın məşhur animasiya filmləri rejissoru Vladimirs Leşçiov jurnalistlərin suallarını cavablandırıb.
Sonra Latviyanın Azərbaycandakı səfirinin müavini xanım Viya Buşa çıxış edərək Latviyanın müstəqilliyinin 103-cü ildönümü münasibətilə Bakıda festivalla yanaşı bir neçə tədbirlər keçirildiyi haqqında məlumat verib.
Festival çərçivəsində müsabiqə elan olunacaq. Müsabiqəyə qatılmaq üçün festivalda nümayiş olunan filmlərə baxmaq mütləqdir. Bundan əlavə müsabiqə iştirakçıları Latviya ilə bağlı və sevimli animasiya personajı haqqında düşüncələrini yazmalıdır. Qalib gələn şəxs Riqaya iki bilet əldə edəcək.
Açılış günü Vladimirs Leşçiovun “Elektrikçinin Günü” filmi nümayiş olunub. Növbəti günlərdə rejissorun “Yeni ili gözləyirik”, “Yağışlı günlər” və “Qanadlar və Avarlar” filmləri göstəriləcək.
