Bakıda “Polşa kino günləri” festivalı başlayır. Bu barədə bu gün, 5 sentyabr tarixində Bakuplus.az festivalı təşkil edən Azərbaycan Kinematoqrafçılar İttifaqının mətbuat xidmətinə istinadən məlumat verir.
Sentyabr ayının 6, 13, 20, 27-də “Azərbaycan CinemaPlus”-da saat 19:00-da nümayiş olunacaq filmlər aşağıdakılardır:
- 6 sentyabr – “Balkondan” tammetrajlı sənədli filmi (2021-ci il, rejissor Pavel Lozinski);
- 13 sentyabr – “Məsihin bədəni” tammetrajlı bədii filmi (2019-cu il, rejissor Yan Komasa);
- 20 sentyabr – “Antiqəhrəman” tammetrajlı sənədli filmi (2021-ci il, rejissor Mixal Kavetski);
- 27 sentyabr – “İzlər qalmasın deyə” tammetrajlı bədii filmi (2021-ci il, rejissor Yan P. Matuşınski).
Festival çərçivəsində sentyabrın 6-da nümayiş ediləcək Pavel Lozinskinin “Balkondan” tammetrajlı sənədli filmi 2021-ci ildə “Locarno Beynəlxalq Film Festivalı”nda “Tənqid həftəsi” (“Semaine de la critique”) bölməsində Qran-Pri qazanıb.
Film üzərində işləyərkən rejissor iki ildən çox vaxtını eyvanında kamera ilə keçirib və yoldan keçənlərlə 2000-ə yaxın söhbəti lentə alıb. Rejissor yoldan insanlara film üçün personajlar axtardığını deyib, onlardan özləri haqqında danışmalarını istəyib, həmçinin həyatın mənası ilə bağlı ekzistensial suallar verib. Bəzi həmsöhbətlər həvəslə dialoqa girir, həyatdan bəlağətlə danışır, rejissoru suallarla incidir, bəziləri qorxusundan, utancından çətinliklə çıxıb qaçırdılar.
Yoldan keçən 80 nəfəri seçən rejissor insan hekayələrinin rəngarəng palitrasını yaradıb və ən vacib olanları - insanlar və onların duyğularını ayırıb.
Filmlər yuxarıda qeyd olunmuş tarixlərdə "Azərbaycan" Cinemaplus kinoteatrında ("Hard Rock" kafesinin arxası) nümayiş olunacaq. Giriş sərbəstdir.
