2-5 noyabr tarixlərində Bakıda "Qalib olan Azərbaycan" adlı tamaşalar festivalı keçiriləcək. Tədbir Mədəniyyət Nazirliyi və Teatr Xadimləri İttifaqının təşkilatçılığı ilə baş tutacaq. Bu haqda Report 8 oktyabr tarixində xəbər verib.
Festival Azərbaycanın 44 günlük Vətən müharibəsində qazandığı şanlı qələbənin birinci ildönümünə həsr olunub.
Münsiflər heyəti tərəfindən seçilən tamaşalar noyabrın 2-dən 5-dək oynanılacaq, sonda qaliblər mükafatlandırılacaq.
Festivalın açılış mərasimi noyabrın 2-də saat 15:00-da Azərbaycan Dövlət Akademik Milli Dram Teatrının "Abbas Mirzə Şərifzadə səhnəsi"ndə rejissoru Emil Əsgərov olan "İnanıram" tamaşası ilə baş tutacaq. Tamaşanın müəllifi Ülviyyə Heydərovadır.
Noyabrın 3-də saat 15:00-da Teatr Xadimləri İttifaqının böyük səhnəsində Bakı Uşaq və Gənc Teatrının "Cənnəta bilet" tamaşası nümayiş olunacaq. Tamaşanın müəllif və rejissoru İlhamə Əhmədovadır.
Noyabrın 4-də saat 15:00-da Teatr Xadimləri İttifaqının böyük səhnəsində Müstəqil layihə "Xoşbəxtliyin dəyəri" tamaşası nümayiş olunacaq. Tamaşanın müəllifi Sahib Məmmədov, rejissoru Raulya Türkkandır.
Festivalın sonuncu günündə saat 15:00-da Teatr Xadimləri İttifaqının böyük səhnəsində müəllifi əməkdar incəsənət xadimi Abdulla Qurbani olan Qusar Dövlət Ləzgi Dram Teatrının "Çingiz dastanı" tamaşası səhnələşdiriləcək. Tamaşanın rejissoru əməkdar mədəniyyət işçisi Faiq Qardaşovdur.
Festivalın bağlanışı və mükafatlandırma mərasimi noyabrın 5-də saat 16:00-da Teatr Xadimləri İttifaqında keçiriləcək.
