Sentyabrın 23-dən 30-dək keçiriləcək 17-ci Beynəlxalq Bakı Caz Festivalının (Baku Jazz Festival) proqramı məlum olub. Bu haqda bu gün, 6 sentyabr tarixində Bakuplus.az məlumat verir.
Festivalda 14 ölkədən musiqiçilər iştirak edəcəklər. Bu il Bakı sakinləri və şəhərin qonaqları konsertlərlə yanaşı, sentyabrın 23-də Heydər Əliyev Mərkəzinin parkında keçiriləcək festivalın açılışında, QGallery-də Dancing Jazz incəsənət sərgisində iştirak edə bilərlər. Həmçinin caz sevənlərə YARAT yaradıcılıq mərkəzində caz filminə baxmaq və canlı musiqi ilə City Jazz Tour avtobus turuna qatılmağa imkan yaradılacaq.
Festival paytaxtın Heydər Əliyev Mərkəzi, Muğam Mərkəzi, Enerji Club, Madrid Restobar, Port Wine and Grill, ADA Universiteti, YARAT, Jakonda, QGallery kimi məkanlarda keçiriləcək.
Bakı Caz Festivalının əsas proqramına hər il olaraq "I am Jazzman!" adlı ifaçılar müsabiqəsi daxildir. Bu müsabiqənin məqsədi gənc istedadları üzə çıxarmaqdır. Bu il müsabiqənin peşəkar münsiflər heyətinə Türkiyə, Fransa və Azərbaycan musiqiçiləri daxil olacaq.
Festivalın digər tədbiri yenidən canlanan vinil plastina mövzusuna həsr olunmuş gecə olacaq. Burada da Azərbaycan konyakının - X.O. Caz adlı xüsusi məhdud buraxılışı təqdim olunacaq.
[URIS id=68541]
