Azərbaycan Dövlət Gənc Tamaşaçılar Teatrında yazıçı-dramaturq Tamara Vəliyevanın eyniadlı əsəri əsasında hazırlanmış “Cəza” monotamaşası sentyabrın 30-da təqdim olunacaq. Bu haqda bu gün, 22 sentyabr tarixində Bakuplus.az məlumat verir.
Psixoloji oyun dramında yeganə rolu Əməkdar artist Kəmalə Hüseynova canlandıracaq. Tamaşanın quruluşçu rejissoru Əməkdar incəsənət xadimi Mehriban Ələkbərzadə, quruluşçu rəssamı Elşən Sərxanoğlu, musiqi tərtibatçısı Ağasəlim Feyzullayev, fəndlərin quruluşçusu isə İsa Əsədovdur.
Tamaşa evli ikən başqa kişiyə aşiq olan qadından bəhs edir. Həyatından narazı, böyük arzularla yaşayan o, istəklə vəzifə arasında seçim edə bilmir, çıxış yolunu intiharda görür.
Tamaşa ilk dəfə, ənənəvi olaraq, Başqırdıstanın Ufa şəhərində keçirilən Türkdilli Xalqların Teatrlarının VI Beynəlxalq “Tuğanlıq” festivalında nümayiş etdirilib. Aktrisa Kəmalə Hüseynova festivalda Başqırdıstan Mədəniyyət Nazirliyinin “İstedadlı ifaya görə” diplomu ilə təltif edilib.
Biletləri onlayn əldə etmək olar.
