Tanınmış azərbaycanlı fotoqraf Rəna Əfəndi fotoqrafiya və fotojurnalistika üzrə nüfuzlu World Press Photo 2022 müsabiqəsində münsiflər heyətinin sədri təyin edilib. Bu haqda o, öz Facebook səhifəsində məlumat paylaşıb.
“Bu il “World Press Photo” dünya üzrə müxtəlif hekayəçiləri cəlb edəcək yeni regional formatla düzgün istiqamətdə gedir. Mən bu həyəcanverici yeni fəslin bir parçası olmaqdan qürur duyuram”, - deyə Əfəndi bildirib.
Rəna Əfəndi 1977-ci ildə Bakıda anadan olub. Onun işi ətraf mühit, münaqişədən sonrakı cəmiyyət, neft sənayesinin insanlara təsiri və sosial bərabərsizlik mövzularına diqqət yetirməkdən ibarətdir.
World Press Photo Beynəlxalq Müsabiqəsi 1955-ci ildə bir qrup hollandiyalı fotoqraflar tərəfindən, işlərini qlobal auditoriyaya nümayiş etdirmək üçün təşkil edilmişdir. Hər il keçirilən World Press Photo müsabiqəsi ötən il istehsal olunmuş ən yaxşı fotojurnalistikanı və sənədli fotoqrafiyanı mükafatlandırır. Hər bir fotoqraf müsabiqədə iştirak edərək regional qalib kimi 1000 avro, qlobal qalib kimi isə əlavə 5000 avro qazana bilər.
