Azərbaycan Dövlət Akademik Opera və Balet Teatrında "Babək" baleti nümayiş olunacaq. Bu haqda 7 noyabr tarixində Bakuplus.az məlumat verir.
9 noyabr saat 19:00-da Azərbaycanın Xalq artisti, bəstəkar Aqşin Əlizadənin "Babək" baletinin nümayişi baş tutacaq. Balet əfsanəvi Xalq qəhrəmanı Babəkin xalqının azadlığı uğrunda mübarizəsinə həsr olunub. Tamaşanın quruluşçu baletmeysteri Xalq artisti Kamilla Hüseynova, quruluşçu rəssamı Əməkdar mədəniyyət işçisi Tehran Babayev, tamaşanın dirijoru isə Orxan Həşimovdur.
Əsas rolları Azərbaycan Respublikasının Əməkdar artistləri Anar Mikayılov, Cəmilə Kərimova, Makar Ferştandt və teatrımızın aparıcı solistləri Ayan Eyvazova və Seymur Qədiyev ifa edəcəklər.
Biletləri teatrın kassasından və iticket.az səhifəsində əldə etmək olar.
