Azərbaycan Dövlət Akademik Opera və Balet Teatrında "Toska" operasının tamaşası keçiriləcək. Bu haqda 12 oktyabr tarixində Bakuplus.az məlumat verir.
Görkəmli italyan bəstəkarı C. Puççininin “Toska” operasının tamaşası oktyabrın 15-də nümayiş olunacaq. Tamaşanı Opera və Balet Teatrının baş dirijoru, Əməkdar artist, Dirijorların beynəlxalq müsabiqələrinin laureatı Əyyub Quliyev idarə edəcək.
Tamaşada Toska partiyasını ifa etmək üçün teatrın rəhbərliyi tərəfindən Ukrayna Milli Operasının solisti, Ukraynanın Əməkdar artisti, Vokalçıların beynəlxalq müsabiqələrinin laureatı Viktoriya Çenskaya dəvət olunub. Əsas partiyalardan biri olan Kavaradossi rolunu Azərbaycanın Əməkdar artisti, İtaliyanın La-Skala Akademiyasının solisti Azər Rza, Skarpia partiyasını isə Xalq artisti, Almaniyanın Manheym Milli Operasının solisti Əvəz Abdulla ifa edəcəklər.
Tamaşada həmçinin, Azərbaycanın Xalq artisti Əli Əsgərov, Əməkdar artistlər Cahangir Qurbanov, Tural Ağasıyev, solistlər Mahir Tağızadə, Rza Xosrovzadə və başqaları iştirak edəcəklər.
