Şuşa Dövlət Musiqili Dram Teatrında uşaqlar üçün “Əlibaba və qırx quldur” tamaşası nümayiş olunacaq. Bu haqda 11 noyabr tarixində Bakuplus.az məlumat verir.
Quruluşçu rejissor Əməkdar artist Loğman Kərimov tərəfindən hazırlanmış “Əlibaba və qırx quldur” tamaşası noyabrın 12-də saat 12:00-da göstəriləcək. Ərəb xalq nağıllarının motivləri əsasında hazırlanan tamaşanın quruluşçu rəssamı Valeh Məmmədov, musiqi tərtibatçısı isə Ağasəlim Feyzullayevdir.
Tamaşa dostluğun, sədaqətin, cəsarətli və qorxmaz olmağın dünya malına tamah salmaqdan daha üstün olduğu haqqındadır. Tamaşa zamanı aktyorlar tamaşaçı zalına da enərək uşaqlarla ünsiyyət yaradır, onlara maraqlı suallar verir, bəzi hallarda səhnəyə dəvət etməklə, uşaqları birbaşa hadisələrin iştirakçısına çevirirlər. Tamaşada rəngarəng musiqi nömrələrindən və əyləncəli rəqslərdən istifadə edilmişdir.
Biletləri teatrın kassasından və ya iticket.az səhifəsindən əldə etmək olar.
