YARAT-da rejissor Vaqif Mustafayevlə görüş təşkil olunacaq. Bu haqda 7 oktyabr tarixində Bakuplus.az məlumat verir.
Görüş 14 oktyabr saat 19:00-da baş tutacaq. Tədbir zamanı qonağın 1995-ci ildə çəkdiyi "Fransız" filmi nümayiş olunacaq. Filmdə Yaşar Nuri, Fərman Şəkili, Zərnigar Ağakişiyeva və Nuriyyə Əhmədova kimi tanınmış aktyorlar çəkilmişdir. Onlarla yanaşı, filmdə fransız dili tərcüməçisi rolunu rəssam Ucal Haqverdiyev canlandırmışdır.
"Fransız" faciəvi komediyası - Azərbaycan dramaturqu, Qazaxıstan və Qırğızıstan Respublikalarının Dövlət Mükafatları Laureatı Əmir Pəhləvanın "Əhlikef" povestinin motivləri əsasında lentə alınmışdır. Ekran əsəri Avropadan qayıdandan sonra öz milli adət-ənənələrimizə yuxarıdan aşağıya baxan həmvətənlərimiz haqqındadır.
