Bakıda ağacəkmə aksiyası keçirilib. Bu haqda Report 11 fevral tarixində xəbər verib.
“Yaponiya-Azərbaycan Dostluq İli 2022” çərçivəsində keçirilən aksiya Bakının Müşfiqabad qəsəbəsində Ekologiya və Təbii Sərvətlər Nazirliyi və Yaponiyanın Azərbaycandakı Səfirliyinin birgə təşkilatçılığı ilə baş tutub.
İki ölkə arasındakı qarşılıqlı əlaqələrə simvolik töhfə vermək məqsədilə keçirilən aksiya zamanı 3 hektar ərazidə Abşeron yarımadasının iqliminə uyğun 3000 müxtəlif cins ağac əkilib.
Tədbirdə nazirliyin rəsmiləri, Yaponiyanın Azərbaycandakı səfiri Vada Cuniçi, “Itochu” şirkətinin Bakı ofisinin rəhbəri Yasuhiro Nakajima, ekokönüllülər, Bakı Dövlət Universitetinin, Azərbaycan Dillər Universitetinin və ADA Universiteti Sakura Klubunun tələbələri, Zirvə Liseyinin, həmçinin 225 saylı orta məktəbin müəllim və şagird kollektivləri iştirak edib.
