Ali Məhkəmədə qəsdən sağlamlığa ağır zərər vurmada təqsirləndirilən İsmayıl Şabanovun kassasiya şikayətinə baxılıb.
Hakim Nazim Mövsümovun sədrliyi ilə keçirilən prosesdə şikayət təmin edilməyib və əvvəlki qərar dəyişdirilmədən saxlanılıb.
İttihama görə, İsmayıl Şabanov 28 aprel 2024-cü ildə qohumu ilə mübahisəyə görə qisas almaq məqsədilə "Toyota Prius"la Qobustan qəsəbəsində "Beşmərtəbə" adlanan əraziyə gedib. O, zərərçəkmiş Məcid Məcidovu avtomobillə divara sıxaraq ağır xəsarət yetirib, daha sonra domkratın dəmir hissəsi ilə başına zərbə endirib.
Bakı Ağır Cinayətlər Məhkəməsi Şabanovu 4 il müddətinə azadlıqdan məhrum edib. Bakı Apellyasiya Məhkəməsi cəzanı 3 ilə endirsə də, Ali Məhkəmə sonradan qərarı qismən ləğv edərək işin yenidən apellyasiya instansiyasında baxılmasına qərar verib. Son olaraq apellyasiya şikayəti təmin edilməyib.
mənbə: pravda.аz
