Havalar isindikcə rəngli paltarlara üstünlük verilir. Yazın gəlişi tək təbiəti deyil, eyni zamanda dəb aləmini ruhlandırır. Allı-güllü baharın rəngləri artıq geyimlərdə seçim şanslarını artırır. Hər il olduğu kimi bu il də yaz ayları özünəməxsus dəbi, fərqli geyim modelləri ilə yadda qalacaq.
Maraqlıdır, 2025-in yaz aylarında dəbdə olacaq geyimlər və rənglər hansılardır?
Yaz aylarında dəbdə olacaq geyimlərlə bağlı Bakuplus.az-a modelyer-dizayner Şəlalə Maqsudova danışıb.
Onun sözlərinə görə, bu ilin yaz aylarında bordo, zeytun yaşılı və şabalıdı rənglərin tonları daha çox ön planda olacaq: “Hər il, hər fəsil dəb aləmində dəyişikliklər olur. Yazın favoriti olan bordo, zeytun yaşılı və şabalıdı rənglərin tonları bu il daha çox ön planda olacaq. Ağ və qara isə hər zaman olduğu kimi klassikanın şah rəngləri olaraq bu ilin modasında da öz yerini qoruyacaq.
Geyim biçimlərinə gəldikdə isə midi ölçüsündəki trapes ətəklər, iri və qolları geniş olan pencəklər diqqət çəkəcək. Bu pencəkləri nazik, incə kəmərlər və aksesuarlarla bəzəmək dəbi tamamlayacaq. Yazda həmçinin, sport və klassikanın qarışığı olan kombinlər daha çox dəbdə olacaq. Bununla yanaşı, cins və kətan parçaların geyimlərdə istifadəsi ön plana çıxacaq”.
Fidan İlqar
