I Qarabağ müharibəsində itkin düşmüş şəhid dəfn edilib. Bu haqda bu gün, 21 may tarixində Bakuplus.az APA-ya istinadən xəbər verir.
Şəhid Elşən Nəzərəli oğlu Xasıyevin 30 ildən sonra kimliyi müəyyənləşib və onunla Sabunçu rayonu, Zabrat qəsəbəsində vida mərasimi keçirilib. Daha sonra o, Bakıxanov qəsəbəsində yerləşən Şəhidlər xiyabanında dəfn olunub.
Şəhidin həyat yoldaşı Təranə Xasiyeva deyib ki, Elşən toylarından 1 il sonra 25 yaşında könüllü olaraq Qarabağ döyüşlərinə qatılıb: "Kəlbəcər, Murov dağı istiqamətində döyüşüb. Bizə demişdilər ki, Murovda itkin düşüb. 30 il idi gözümüz yolda idi. Oğlum atasını görmədi. Elşən 1994-cü ilin fevralında şəhid olub, oğlum apreldə dünyaya gəlib. Hər dəfə deyirdi: “Atamın məzarı da olmadı ki, gedib dərdləşim”.
Birinci Qarabağ müharibəsində itkin düşdüyü ehtimal edilən Elşən Xasıyev Gəncədəki Şəhidlər xiyabanında naməlum şəhid kimi dəfn olunmuşdu.
