Bakının Nizami rayonunda 44 yaşlı kişinin qeyri-rəsmi münasibətdə olduğu qadına xəsarət yetirməsi ilə bağlı cinayət işinə baxılıb.
Hadisə tərəflərin birgə yaşadıqları mənzildə baş verib. 1982-ci il təvəllüdlü Aqil qeyri-rəsmi münasibətdə olduğu Ülkərlə mübahisə edib.
Mübahisə Ülkərin Aqildən pul istəməsi səbəbindən, şəxsi münasibətlərin pozulması zəminində yaranıb. Mübahisə zamanı Aqil Ülkərin baş nahiyəsinə əli ilə bir dəfə zərbə vuraraq ona sağlamlığın qısa müddətə pozulmasına səbəb olan xəsarətlər yetirib.
Faktla bağlı Aqilə Cinayət Məcəlləsinin qəsdən sağlamlığa zərər vurma maddəsi ilə ittiham irəli sürülüb və cinayət işi baxılması üçün Nizami Rayon Məhkəməsinə göndərilib.
Məhkəmə araşdırması zamanı Aqilin qadınla barışdığı müəyyən edilib. Bu səbəbdən Ülkər ona qarşı şikayətini geri götürüb.
Məhkəmə Aqilin barəsində olan cinayət işi üzrə icraata bəraətverici əsaslar olmadan xitam verilməsi barədə qərar qəbul edib. O, cinayət məsuliyyətindən azad edilib.
Mənbə: Demokrat.аz
