“Respublika Perinatal Mərkəzi”ində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.
Apa.az xəbər verir ki, bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi keçirilən prosesdə zərərçəkənlər ifadə verib.
İş üzrə zərərçəkən qisimdə tanınan Gülbahar Zülfüqarova məhkəmədə bildirib ki, o, mərkəzin Təcili və təxirəsalınmaz Tibbi yardım şöbəsində çalışır:
“Mən orada “mamaça” vəzifəsində çalışıram. Həmin gün növbədə idim. Bizim şöbə birinci mərtəbədədir. Hadisə dördüncü mərtəbədə baş verib. Mən ora cavabdeh deyiləm. Kimsə dedi ki, 4-cü mərtəbədə yanğın baş verib. Qalxdıq. Soruşdum ki, kiməsə demisiniz? Təkcə, polisə məlumat verdiklərini dedilər. Mən tez aidiyyəti orqanlara və Mehriban xanıma məlumat verdim. Daha sonra yenə ora qayıtdım. Qara tüstü ətrafı bürüdü.
Yuxarıda yeriyə bilməyən xəstələr, küveyzdə saxlanılan uşaqlar var idi. Onlar həkim nəzarətində olduğundan mənim onları götürməyə və ya yerini dəyişməyə səlahiyyətim yox idi”.
Daha sonra Vaqif Hacıyev ifadə verib.
O, bildirib ki, mərkəzdə mühafizəçi olaraq çalışır:
“Mən mərkəzin daxili mühafizəçisiyəm. Mənimlə yanaşı, DİN-in mühafizə xidmətindən də bir şəxs var. Adətən, mərkəzdə xəstə olarkən biz yeməyə gec gedirik. Həmin gün də yeməyə gec getdim. Resepşında çalışan qız mənə zəng etdi. Danışıqdan heç nə anlamadım. Elə bildim dava olub. Resepşına qaçdım. Gördüm heç kim yoxdur. Bilmədim kim idi, amma 4-cü mərtəbədə yanğın olduğunu eşitdim. Balon götürüb 4-cü mərtəbəyə qaçdım. Hamı ora yığışmışdı. Balonla söndürməyə çalışdıq. Ətraf qara tüstü idi. Rəhbərlik ora yanğınsöndürənlərdən öncə gəlmişdi. Yanğının söndürülməsi üçün işlər görürdü. Biz küveyzlərin təhlükəsiz yerə aparılması üçün köməklik etdik”.
İfadə verən hər iki şəxs iş üzrə özlərinin zərərçəkən qisimdə tanınmasını istəməyib.
Bir neçə zərərçəkən şəxs məhkəmədə iştirak etməyib.
Məhkəmə onlar barəsində məcburi gətirməsi haqqında qərar qəbul edib.
Proses aprelin 28-də davam etdiriləcək.
