Bakı Ağır Cinayətlər Məhkəməsində ötən ilin yanvarında Respublika Perinatal Mərkəzində 7 körpənin ölməsiylə nəticələnən yanğınla bağlı məhkəmə işi davam edir.
Qaynarinfo.az xəbər verir ki, məhkəmə qarşısında Mərkəzin keçmiş direktoru Mehriban Abbasquliyeva və şöbə müdirləri dayanıb. Onların hər biri ev dustaqlığındadır. Bu iş hakim Leyla Əsgərova-Məmmədovanın icraatındadır.
Aprelin 28-də keçirilən məhkəmə iclasında zərərçəkənlər dindirilib. Məhkəmə əvvəlcə Elvin Nəcəfovun ifadəsini alıb. Nəcəfov mühafizə polisinin əməkdaşıdır, Respublika Perinatal Mərkəzində də həmin vəzifədə işləyib. O, bildirib ki, hadisə günü növbədə olub. Xəstəxananın 4-cü mərtəbəsində başlayan yanğından qeydiyyat bölməsinin Gülbahar adlı əməkdaşından xəbər tutub və ora gedib. "Küvəzlər olan otaq yanırdı. Bir küvəz alışmışdı. Əvvəlcə su ilə söndürməyə çalışdım, sonra yanğınsöndürən balonları götürdüm. 6 uşaq xilas edə bildim", deyən zərərçəkən təqsirləndirilən şəxslərdən şikayət və tələbinin olmadığını da vurğulayıb.
Zərərçəkən Vaqif Abdullayev isə ifadəsində göstərib ki, həmin gün həyat yoldaşını xəstəxanaya yerləşdirərək rayona qayıdıb. Həyat yoldaşı zəng vuraraq yanğın başladığını bildirəndə nə edəcəyini bilməyib: "Əlim şəhərdə yaşayan anama çatdı. Zəng vurdum, dedim, xəstəxana yanır. Anam və başqa qohumlarım özlərini ora çatdırıb. Rayondan birbaşa Mərkəzə qayıtdım. Öyrəndim ki, yoldaşımı və körpəmi ayrı-ayrı xəstəxanalara yerləşdiriblər. 8 illik müalicələrdən sonra övlad sahibi olmuşdu, bunlara görə balamızı itirdik. Hələ də özümüzə gələ bilməmişik. Əlbəttə ki, şikayətçiyəm, cəzalandırılmalarını tələb edirəm".
Zərərçəkən Nəzrin Qurbanova da yanğın nəticəsində körpəsini itirib. O, məhkəmədə bunları deyib: "Hadisədən 3-4 gün öncə evə buraxıldım. Lakin övladımın səhhətində ağırlaşma olduğu üçün buraxmadılar. Onu ziyarətə gələndə otaqda görmədim. Elə bildim bölməni dəyişiblər. Sonradan övladımın otağının yanğın baş verən otağa dəyişdirildiyini öyrəndim. Yanğın zamanı övladım xəsarət alaraq ölüb. Təqsirləndirilən şəxslərin qanun çərçivəsində cəzalandırılmasını istəyirəm".
Zərərçəkən Aynurə Əhmədova Mərkəzdə təmizlikçi işləyirmiş. Yanğın başlayanda 4-cü mərtəbədəki qışqırıq səsləri eşidib və ora gedib: "Tibb bacıları və digər xadimə ilə vedrələrlə su daşıyırdıq ki, yanğını söndürək. Yanğın elektrik yuvasından başladı və biz ora su töküb söndürməyə çalışdıq. Yanğın pərdə vasitəsi ilə yayıldı və sonra küvəzlərə keçdi. Sonra yanğın baş verən otaqdan uşaqları çıxarıb aşağı mərtəbəyə apardıq. 15 uşağı mən özüm ikinci mərtəbəyə aparıb təhvil vermişəm. Mərtəbədə bircə yanğınsöndürmə balonu var idi".
Zərərçəkənlər dindiriləndən sonra hakim növbəti məhkəmə iclasını mayın 19-na təyin edib.
Respublika Perinatal Mərkəzdəki yanğın hadisəsi ötən il yanvarın 9-da baş verib. Nəticədə Yenidoğulmuşların intensiv terapiya şöbəsində küvəzdəki yenidoğulmuşlar ölüb.
İstintaq orqanı tərəfindən Mehriban Abasquliyevaya qarşı Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayevə və Elnur Əhmədliyə qarşı Cinayət Məcəlləsinin 225.3-cü maddəsi ilə cinayət işi başlanıb.
