Bakı Baş Səhiyyə Mərkəzinin strukturuna daxil olan 3 nömrəli Vərəm Əleyhinə Dispanserin əmlak bazasında "Ağciyər Xəstəlikləri Mərkəzi" publik hüquqi şəxs yaradılır.
Report-a TƏBİB-dən verilən məlumata görə, bu qərar TƏBİB-in Müşahidə Şurası tərəfindən qəbul edilib. Mərkəzə Bakı Baş Səhiyyə Mərkəzinin strukturuna daxil olan 1, 2, 3, 4, 5, 6 nömrəli Vərəm əleyhinə Dispanserlər, 1 və 2 nömrəli Xüsusiləşdirilmiş Vərəm Xəstəxanası, 1 nömrəli Uşaq Vərəm Xəstəxanası və Abşeron Rayon Mərkəzi Xəstəxanasının Saray Modul tipli Vərəm Xəstəxanası daxil ediləcək.
TƏBİB-in tabeliyindəki digər tibb müəssisələrinin (50 rayon mərkəzi xəstəxanası) ftiziatrik kabinetləri və vərəm şöbələri də mərkəzə daxil olacaq.
Yeni mərkəzin yaradılmasında məqsəd vərəm əleyhinə mübarizə xidmətinin təşkili, idarəetmə və koordinasiya işlərinin optimallaşdırılması, vərəm və ağciyər xəstəliklərinin profilaktikası, vaxtında aşkarlanması, diaqnostikası və müalicəsi üzrə tədbirlərin keyfiyyətinin artırılması, infrastrukturun səmərəli istifadəsi və tibbi xidmətlərin keyfiyyətinin yaxşılaşdırılmasıdır.
