Ağstafa sakini öz yurdundan Bakıya yürüyərək getmək istəyir. Bu haqda bu gün, 2 may tarixində Bakuplus.az Azertac-a istinadən xəbər verir.
Ağstafanın Səməd Vurğun qəsəbəsinin sakini, 34 yaşlı atlet Ağa Əliyev Ağstafadan Bakıya 466 kilometr yolu piyada qət etməyi planlaşdırır. O, bu məsafəni 5 gün ərzində qət etməyi düşünür.
“Əgər bu reallaşsa, Azərbaycanda ilk olacaq. İndiyədək ölkəmizdə hər hansı atlet 5 gün ərzində 466 kilometr məsafəni qət etməyib”, - deyə atlet qeyd edib.
Ağa Əliyev 20 ildir qaçışla məşğul olduğunu, Azərbaycan və Türkiyədə keçirilən marafonlarda iştirak etdiyini bildirib.
Bu gün səhər saatlarından Ağstafa şəhərindən, Heydər Əliyev Mərkəzinin qarşısından yola çıxan Ağa Əliyev yürüşü Bakı şəhəri Fəxri xiyabana qədər davam etdirəcək.
Yürüş Gənclər və İdman Nazirliyi və Azərbaycan Atletika Federasiyası tərəfindən təşkil olunub. Atlet ümumilikdə dayanacaq olaraq 5 nöqtədə fasilə edəcək. O, bu yürüşünü ümummilli liderin anadan olmasının 100 illiyinə həsr edib.
