Abşeron Milli Parkına martın 23-dən müntəzəm avtobus marşrut xətti açılır. Bu haqda bu gün, 21 mart tarixində Bakuplus.az parkın mətbuat xidmətinə istinadən məlumat verir.
Yeni müntəzəm marşrut xətti “Koroğlu” metrosu - Abşeron Milli Parkı və Abşeron Milli Parkı - “Koroğlu” metrosu istiqamətləri ilə müəyyən ediləcək.
Daşınma xidməti "Zirə bələdiyyəsi nəqliyyat xidməti" MMC tərəfindən həyata keçiriləcək.
Avtobus marşrutu martın 23-dən martın 26-dək, Novruz tətili günlərində fəaliyyət göstərəcək, sonrakı dövrdə daşınma xidməti, yalnız həftənin şənbə və bazar günlərini əhatə edəcək.
Uzunluğu 68 km təşkil edən marşrut üzrə hərəkət edəcək 22 yerlik avtobus səhər saat 10:30-da “Koroğlu” metrosundan yola düşəcək, saat 16:30-da Abşeron Milli Parkından geri qayıdacaq.
Daha ətraflı məlumat üçün vətəndaşlar "Zirə bələdiyyəsi nəqliyyat xidməti" MMC-nin 0708286434 tel/WhatsApp nömrəsinə müraciət edə bilərlər.
