Xəbər verdiyimiz kimi, Mərkəzi Seçki Komissiyası növbədənkənar parlament seçkilərinin ilkin nəticələrini ictimaiyyətə təqdim edib. 125 seçki dairəsi üzrə lider namizədlərin adları açıqlanıb.
Bakuplus nəticələrə əsasən, Abşeron rayonu seçki dairəsi üzrə 3 namizəd haqqında məlumat təqdim edir.
Nigar Məmmədova
Nigar Məmmədova Bakı Dövlət Universitetinin Beynəlxalq hüquq və beynəlxalq münasibətlər fakültəsində bakalavr və magistr təhsili alıb. O, həmçinin London Universitetinin “Qlobal Diplomatiya – Müasir Dünya Diplomatiyası”, Miçiqan Universitetinin “Uğurlu danışıqlar: Əsas strategiyalar və bacarıqlar” proqramlarını bitirmişdir.
Əmək fəaliyyətinə 2001-ci ildə Vergilər Nazirliyində başlayan N. Məmmədova həmin Nazirliyin Beynəlxalq vergi münasibətləri idarəsində, 2003-2014-cü illərdə Protokol şöbəsinin rəisi vəzifəsində çalışıb, vergi xidməti müşaviri rütbəsinə yüksəlib.
2018-ci ildə Əmək və Əhalinin Sosial Müdafiəsi Nazirliyinin Protokol sektorunun müdiri təyin olunub. 2022-ci ilin may ayından DOST İnklüziv İnkişaf və Yaradıcılıq Mərkəzinin direktor müavini vəzifəsinə, 2023-cü ilin 1 sentyabr tarixindən etibarən isə DOST İnklüziv İnkişaf və Yaradıcılıq Mərkəzinin direktoru vəzifəsinə təyin edilib.
Rus, ingilis və fransız dillərini bilir.
Rizvan Nəbiyev
R.Nəbiyev 1975-ci ildə Göyçə mahalının Basarkeçər rayonunun Qanlı kəndində anadan olub. BDU-da Beynəlxalq münasibətlər üzrə mütəxəssis bakalavr (1997) və Almaniyanın Saarbrüken Universitetində Avropa hüququ üzrə magistr təhsili – LL.M. (1999) alıb. Berlin Azad Universitetində Siyasi elmlər doktoru (Dr.rer.pol) elmi dərəcəsinə yiyələnib (2003). Müstəqilliyimiz tarixində Almaniyada humanitar elmlər sahəsində müdafiə edən ilk azərbaycanlı alim olub. Xəzər hövzəsində enerji siyasəti və geosiyasi maraqlar mövsuzunda kitabı alman dilində nəşr edilib (Berlin, 2004). Dünyanın 100 ən yaxşı universiteti sırasında olan Berlin Azad Universitetində dərs deyib.
Ermənistanın Azərbaycana qarşı ərazi iddialarına dair alman və ingilis dillərində 15 kitabın yazılması və nəşrini təmin edib. Alman və ingilis dillərində nəşr olunmuş “Şuşanın irsi” elmi monoqrafiyasının həmmüəllifidir (Berlin, 2022-2023).
R.Nəbiyev 20 ildən artıqdır diplomatik fəaliyyətdədir, Azərbaycanın Almaniyadakı Səfirliyində və Xarici İşlər Nazirliyində müxtəlif məsul vəzifələrdə çalışıb. 2022-ci ildən Xarici İşlər Nazirliyində İdarə rəisidir. 80-dən artıq dövlətlə beynəlxalq müqavilələrin və digər sənədlərin razılaşdırılması və imzalanmasına töhfə verib. Ölkəmizin təqdimatına həsr edilmiş “2008 - Almaniyada Azərbaycan İli”nin Səfirlik üzrə Əlaqələndiricisi olub. Səmərəli fəaliyyəti ilə əlaqədar olaraq “Dövlət qulluğunda fərqlənməyə görə” medalı ilə təltif edilib və bir sıra digər təltiflərə layiq görülüb.
Ailəlidir, iki övladı var.
Ramid Namazov
Ramid Namazov 2005-ci ildən çalışdığı Azərbaycan Respublikası Prezidenti Administrasiyasının Xarici əlaqələr şöbəsinin müşaviridir. Xarici siyasət məsələləri ilə bağlı brifinqlər və analitik hesabatlar hazırlayır, habelə Xarici İşlər Nazirliyinin rəsmiləri üçün beynəlxalq əlaqələrə dair çıxışlar hazırlayır. Prezident Administrasiyası. Cənab Namazov Cons Hopkins Universitetinin Qabaqcıl Beynəlxalq Araşdırmalar Məktəbində (SAIS) magistr dərəcəsi (2013) və Prezident yanında Dövlət İdarəçilik Akademiyasında (2009) dövlət idarəçiliyi üzrə magistr dərəcəsinə malikdir. O, həmçinin Bakı Dövlət Universitetində Biznes və Mülki Hüquq üzrə magistr (2006) və Hüquq üzrə bakalavr (2003) dərəcəsinə malikdir. Bundan əlavə, cənab Namazov Corc Marşall Təhlükəsizlik Araşdırmaları Mərkəzinin Azərbaycan Müdafiə Nazirliyi, Azərbaycan Diplomatik Akademiyası və Çin, Misir və digər ölkələrin Xarici İşlər Nazirlikləri ilə birgə təşkil etdiyi xüsusi kurslarda iştirak edib.
